Usariver, Arusha –
Waziri wa Kilimo, Daniel Chongolo, amewapongeza wananchi wa Usariver kwa ushirikiano wanaouonyesha katika utekelezaji wa miradi ya maendeleo, akisema mshikamano wao umeendelea kuwa chachu ya maendeleo ya eneo hilo.
Akizungumza mbele ya wananchi wakati wa ziara ya kukagua maendeleo ya miradi ya miundombinu, Chongolo amesema Serikali ya Awamu ya Sita inaendelea kuwekeza kwa kiwango kikubwa katika ujenzi wa barabara ili kurahisisha usafiri na usafirishaji wa mazao, kukuza biashara, kuimarisha utalii na kuchochea ukuaji wa uchumi wa wananchi.
Waziri huyo amesema miundombinu bora ndiyo uti wa mgongo wa maendeleo ya sekta mbalimbali, hususan kilimo, biashara na utalii, ambazo zinategemewa kuinua kipato cha wananchi wa Mkoa wa Arusha na Taifa kwa ujumla.
«”Niwapongeze wananchi wa Usariver kwa ushirikiano wanaouonyesha katika utekelezaji wa miradi ya maendeleo. Serikali inaendelea kutekeleza miradi hii kwa ajili ya kuwahudumia wananchi, hivyo ushirikiano wenu ni muhimu katika kuhakikisha miradi hiyo inakamilika kwa wakati na kwa ubora unaotakiwa,” amesema Chongolo.»
Katika hotuba yake, Waziri Chongolo pia ameipongeza TANROADS Mkoa wa Arusha kwa usimamizi madhubuti wa miradi ya ujenzi wa barabara, akieleza kuwa kazi inayofanywa na wakala huo imeendelea kufungua fursa za kiuchumi kwa wananchi na kuboresha huduma za usafiri katika maeneo mbalimbali ya mkoa huo.
«”Niwapongeze TANROADS Arusha kwa kazi kubwa wanayoifanya ya kusimamia ujenzi wa barabara zenye viwango. Miundombinu hii siyo tu inarahisisha usafiri, bali pia inafungua fursa za biashara, kilimo na utalii ambazo ni nguzo muhimu za uchumi wetu,” amesema.»
Amesema Mkoa wa Arusha una nafasi ya kipekee kutokana na uzalishaji wa mazao ya kilimo, shughuli za biashara pamoja na uwepo wa vivutio vikubwa vya utalii, hivyo uboreshaji wa barabara utaongeza ushindani wa uchumi wa eneo hilo na kuvutia uwekezaji zaidi.
Chongolo amesisitiza kuwa Serikali itaendelea kusimamia kwa karibu utekelezaji wa miradi yote ya maendeleo ili kuhakikisha fedha za umma zinatumika kwa ufanisi na wananchi wanapata huduma zinazostahili.
Aidha, amewataka wakandarasi wanaotekeleza miradi hiyo kuhakikisha wanazingatia viwango vya ubora na kukamilisha kazi ndani ya muda uliopangwa, huku akiwataka wataalamu wa TANROADS kuendelea kusimamia miradi hiyo kwa weledi.
Kwa upande wake, wananchi wa Usariver wameeleza kuridhishwa na hatua ya Serikali kuendelea kuboresha miundombinu ya barabara, wakisema miradi hiyo itarahisisha usafiri, kupunguza gharama za usafirishaji wa mazao na kuongeza fursa za kiuchumi kwa jamii.
Utekelezaji wa miradi hiyo ni sehemu ya jitihada za Serikali za kuimarisha miundombinu nchini, ikiwa ni mkakati wa kuchochea maendeleo ya uchumi, kuongeza tija katika sekta ya kilimo na kuboresha huduma za kijamii kwa wananchi.
