Matumizi ya nishati safi nchini Tanzania yanazidi kupata msukumo mpya kufuatia kuanza kwa matumizi ya teknolojia ya prepaid gas meter, mfumo unaowezesha watumiaji kulipia kiwango halisi cha gesi wanachotumia.
Teknolojia hiyo imeanza kuvutia wadau mbalimbali wa sekta ya utalii, wamiliki wa apartment, taasisi na makampuni yanayotumia gesi kwa shughuli zao za kila siku.
Akizungumza katika maonyesho ya Karibu-KiliFair 2026, Moses Massawe, Meneja wa Mauzo wa Kitengo cha Wateja Wakubwa wa Taifa Gas Tanzania, alisema mfumo huo umeundwa kuongeza uwazi na ufanisi katika matumizi ya gesi.
Kwa mujibu wake, watumiaji wa apartment, kambi za taasisi, makazi ya pamoja na majengo yenye wapangaji wengi sasa wataweza kufuatilia matumizi yao binafsi na kulipia kiwango walichotumia pekee.
“Wazo kuu ni kuhakikisha kila mtumiaji analipia kile alichotumia bila kubeba gharama za wengine. Hii ni teknolojia mpya ambayo inaleta urahisi mkubwa kwa wamiliki wa majengo na watumiaji wa mwisho,” alisema.
Sekta ya Utalii Yanufaika na Nishati Safi
Mbali na matumizi ya makazi, teknolojia ya gesi imeendelea kuimarisha shughuli za utalii katika maeneo mbalimbali nchini.
Hoteli, lodges na camps zilizopo katika hifadhi za Serengeti, Ngorongoro, Tarangire na Manyara zimeendelea kuhamia kwenye matumizi ya gesi kama njia ya kupunguza athari za mazingira na kuongeza ufanisi wa huduma kwa wageni.
Wataalamu wa nishati wanaeleza kuwa matumizi ya gesi katika maeneo ya utalii yanaweza kusaidia kupunguza matumizi ya kuni na mkaa, hivyo kuchangia juhudi za uhifadhi wa mazingira na maliasili.
Taasisi na Viwanda Vyahimizwa Kutumia Nishati Safi
Kadri Tanzania inavyoendelea kutekeleza ajenda ya nishati safi, taasisi, shule, hospitali, viwanda na makampuni makubwa yanahimizwa kuwekeza katika matumizi ya gesi ili kupunguza gharama za uendeshaji na kuongeza usalama wa mazingira ya kazi.
Wadau wa sekta hiyo wanaamini kuwa upanuzi wa miundombinu ya gesi pamoja na ujio wa teknolojia mpya za usimamizi wa matumizi utasaidia kuongeza kasi ya matumizi ya nishati safi nchini katika miaka ijayo.
Hatua hizi zinaonekana kuwa sehemu muhimu ya safari ya Tanzania kuelekea matumizi ya nishati endelevu, salama na rafiki kwa mazingira kwa manufaa ya kizazi cha sasa na kijacho.
