Na Geofrey Stephen Arusha, Tanzania
Kampuni ya ALC Lubricant, inayozalisha na kusambaza vilainishi vya magari kupitia chapa yake ya Flying Horse, imefungua rasmi ofisi yake ya kwanza ya Kanda ya Kaskazini katika Jiji la Arusha. Hatua hii inalenga kusogeza huduma karibu na wateja pamoja na kuboresha upatikanaji wa bidhaa zake katika ukanda huo.
Mbali na kuhudumia wakazi wa Arusha, ofisi hiyo pia itatoa huduma kwa wateja wa Moshi na maeneo mengine ya jirani. Kampuni imeeleza kuwa huu ni mwanzo wa mpango wake wa kupanua mtandao wa usambazaji kwa kufungua ofisi zaidi ndani ya Mkoa wa Arusha na maeneo mengine ya Kanda ya Kaskazini.
Suluhisho kwa Changamoto za Upatikanaji wa Vilainishi.
Kwa muda mrefu, wateja wa Kanda ya Kaskazini walilazimika kuagiza vilainishi na bidhaa nyingine kutoka Dar es Salaam, hali iliyosababisha ucheleweshaji wa huduma, gharama kubwa za usafirishaji na changamoto za upatikanaji wa bidhaa kwa wakati.
Kupitia ofisi mpya ya Arusha, ALC Lubricant inatarajia kurahisisha upatikanaji wa bidhaa za Flying Horse kwa kuhakikisha wateja wanapata huduma kwa haraka, kwa urahisi na karibu na maeneo yao.
Flying Horse Yatoa Mbadala wa Vilainishi Vyenye Ubora.
Katika kipindi ambacho soko limekumbwa na changamoto ya uwepo wa vilainishi visivyo na ubora, vinavyoweza kusababisha uharibifu wa injini na kuongeza gharama za matengenezo, Flying Horse imejipanga kutoa suluhisho kupitia bidhaa zinazokidhi viwango vya ubora na zinazolenga kuongeza ufanisi wa matumizi ya magari.
Akizungumzia hali hiyo, kampuni imeeleza kuwa lengo lake si kushindana na bidhaa zisizo na viwango, bali kuwapa wateja chaguo la vilainishi salama na vinavyoaminika.
“Ni kweli kuna changamoto ya uwepo wa oil feki sokoni. Hata hivyo, Flying Horse haijaja kushindana na oil feki, bali imekuja kutoa suluhisho kwa matatizo yanayosababishwa na matumizi ya vilainishi visivyo na ubora.”
Ubora Unaookoa Gharama za Matengenezo.
Kwa mujibu wa kampuni, vilainishi vya Flying Horse vimetengenezwa kwa teknolojia ya kisasa inayowezesha kutumika kwa muda mrefu na kwa umbali mkubwa wa kilomita bila kupoteza ubora wake. Hii huwasaidia wamiliki wa magari kupunguza gharama za matengenezo huku wakihakikisha injini zao zinaendelea kufanya kazi kwa ufanisi.
Aidha, kampuni imeweka mkazo katika kuhakikisha bidhaa zake zinapatikana kwa bei nafuu ili kumwezesha kila mmiliki wa gari kumudu gharama za matumizi.
“Tunaamini oil si anasa; ni hitaji muhimu la kila gari, sawa na umuhimu wa maji kwa maisha ya binadamu. Lengo letu ni kuhakikisha kila mmiliki wa gari anapata oil yenye ubora kwa bei inayomwezesha kuokoa fedha na kuzielekeza kwenye mahitaji mengine muhimu.”
Ushirikiano na Madereva wa Sekta ya Usafiri.
ALC Lubricant tayari imeanza kushirikiana kwa karibu na madereva wa mabasi, malori, magari ya Bolt, Bajaji pamoja na Bodaboda kwa kuwapatia vilainishi vinavyosaidia kupunguza gharama za uendeshaji na kuongeza ufanisi wa vyombo vyao vya usafiri.
Kupitia ushirikiano huo, kampuni inalenga kuelewa changamoto zinazowakabili watumiaji wa vilainishi na kuendelea kuboresha bidhaa zake ili zikidhi mahitaji halisi ya soko.
Dhamira ya Kuwafikia Watanzania Wengi Zaidi
Ufunguzi wa ofisi ya Arusha ni sehemu ya mkakati mpana wa ALC Lubricant wa kusambaza bidhaa za Flying Horse katika maeneo mbalimbali nchini. Kampuni inaendelea kuwekeza katika upanuzi wa mtandao wake wa usambazaji ili kuhakikisha Watanzania wengi zaidi wanapata vilainishi bora, huduma za karibu na bei rafiki.
Kwa hatua hii mpya, Flying Horse inaimarisha nafasi yake katika soko la vilainishi nchini huku ikiendelea kujenga uhusiano wa karibu na wateja kupitia bidhaa zenye ubora, upatikanaji wa haraka na huduma zinazokidhi mahitaji ya watumiaji wa kila siku
Mwisho .
