Na Geofrey Stephen wa A24tv .
Mwanasheria Mkuu wa Serikali, Hamza Johari, amewataka watumishi wa Ofisi ya Mwanasheria Mkuu wa Serikali kuendelea kufanya kazi kwa bidii, nidhamu na weledi ili kuhakikisha taasisi hiyo inatimiza kikamilifu wajibu wake wa kikatiba na kisheria kwa manufaa ya Taifa.
Akizungumza katika Mkutano wa Pili wa Baraza la Wafanyakazi wa ofisi hiyo uliofanyika jijini Arusha, Johari alisisitiza umuhimu wa matumizi sahihi ya muda wa kazi pamoja na uwajibikaji wa kila mtumishi katika nafasi yake
Alieleza kuwa ufanisi wa ofisi hiyo unategemea kwa kiasi kikubwa nidhamu, uadilifu na mshikamano wa watumishi wake. Aidha, alisisitiza kuwa utoaji wa huduma bora za kisheria unapaswa kuendana na matarajio ya Serikali pamoja na wananchi kwa ujumla.
“Tuna wajibu wa kuhakikisha tunatoa huduma za kisheria kwa ubora, ufanisi na tija inayotarajiwa. Hili linawezekana endapo kila mmoja atatekeleza majukumu yake kwa nidhamu na kujituma,” alisema Johari.
Johari pia alibainisha kuwa Serikali inaendelea kuimarisha mifumo ya kisheria ili kuhakikisha inakuwa imara na yenye kuongoza mwelekeo wa maendeleo ya Taifa.
“Sheria ni msingi wa maendeleo ya nchi. Bila mifumo imara ya kisheria, Taifa linaweza kupoteza dira yake,” alisisitiza.
.Ushirikiano na Mafanikio.
Kwa upande wake, Makamu Mwenyekiti wa Baraza la Wafanyakazi, Samweli Maneno, alisema ofisi hiyo imeendelea kupata mafanikio kutokana na ushirikiano mzuri kati ya watumishi na menejimenti.
Alieleza kuwa hali hiyo imeimarisha utendaji kazi, hasa katika usimamizi wa mikataba ya Serikali na matumizi bora ya rasilimali za umma.
Aidha, aliongeza kuwa licha ya changamoto zilizopo, ofisi imeendelea kuboresha mazingira ya kazi, kuwekeza katika rasilimali watu na kutoa mafunzo yanayowawezesha watumishi kuendana na mabadiliko ya kitaaluma.
Kuboresha Maslahi ya Watumishi.
Akizungumza kwa niaba ya wafanyakazi, Katibu wa Baraza hilo, William Mudogo, alisema bado kuna haja ya kuendelea kuboresha maslahi ya watumishi ili kuongeza morali na ufanisi kazini.
Alipongeza juhudi za Serikali katika kuboresha huduma za afya, upatikanaji wa vitendea kazi, mafunzo pamoja na ujenzi wa ofisi mpya katika mikoa mbalimbali, hatua ambazo zimeongeza ari ya kazi kwa watumishi.
Baraza hilo pia lilipongeza upanuzi wa ofisi za Mwanasheria Mkuu katika baadhi ya mikoa, likisema hatua hiyo inasaidia kusogeza huduma za kisheria karibu zaidi na wananchi.
Hitimisho.
Akihitimisha, Johari alisisitiza kuwa mafanikio ya taasisi yoyote ya umma yanategemea nidhamu na uwajibikaji wa watumishi wake.
“Nidhamu ndiyo msingi wa mafanikio. Bila nidhamu, hata uwezo mkubwa hauwezi kuleta matokeo chanya,” alihitimisha.
Mwishooo.
