Na Joseph Ngilisho-ARUSHA
Mbunge mteule wa Mkoa wa Arusha kupitia Chama cha Mapinduzi (CCM), Chiku Issa, ametoa wito kwa wananchi kote nchini kujitokeza kwa wingi kushiriki Uchaguzi Mkuu wa Oktoba 29, 2025, akisisitiza umuhimu wa kudumisha amani, umoja na utulivu wakati wa mchakato mzima wa uchaguzi.
Akizungumza na vyombo vya habari jijini Arusha, Chiku Issa alianza kwa kutoa shukrani za dhati kwa Mwenyezi Mungu, kwa kuendelea kulijalia Taifa la Tanzania amani na neema hadi kufikia kipindi cha uchaguzi mkuu.
<span;>> “Naungana na Watanzania wenzangu kumwomba Mungu atujaalie Uchaguzi Mkuu wa 2025 uwe wenye amani na utulivu, kama ilivyokuwa katika chaguzi zilizopita chini ya uongozi wa Chama cha Mapinduzi (CCM) na watangulizi wake TANU na ASP,” alisema Chiku kwa utulivu na tabasamu la matumaini.
Chiku Issa aliwataka wananchi, hususan wanachama na wapenzi wa CCM, kuhakikisha wanajitokeza kwa wingi siku ya uchaguzi kumpa kura ya ‘NDIO’ Rais Mheshimiwa Dkt. Samia Suluhu Hassan, pamoja na wagombea wa ubunge na udiwani wa CCM nchi nzima.
<span;>> “Tarehe 29 Oktoba ni siku muhimu ya kuamua hatima ya maendeleo ya Taifa letu. Tuende tukampigie kura Mama yetu, Rais Dkt. Samia Suluhu Hassan, ambaye amekuwa kielelezo cha uongozi wa busara, uadilifu na upendo kwa Watanzania wote,” alisisitiza Mbunge huyo mteule.
Aliongeza kuwa Chama cha Mapinduzi kimeendelea kuwa nguzo imara ya umoja, amani, upendo na maendeleo tangu kuanzishwa kwake, na kwamba Watanzania wana kila sababu ya kuendelea kukiamini chama hicho ambacho kimewapa dira sahihi ya maendeleo.
Amsifu Rais Samia kwa uongozi wa hekima
Mbunge huyo mteule alimpongeza Rais Dkt. Samia Suluhu Hassan kwa kuendelea kusimamia misingi ya amani, usalama na maendeleo endelevu, akisema falsafa yake ya Amani Kwanza, Maendeleo Baadaye imeleta matumaini mapya kwa taifa.
<span;>> “Mheshimiwa Rais Samia amekuwa kiongozi mwenye maono ya kweli kwa Taifa hili. Ameweka msingi thabiti wa uchumi wa viwanda, elimu bora, afya kwa wote na uwezeshaji wa wanawake. Sisi kama viongozi wa CCM tutaendelea kumuunga mkono kwa vitendo,” alisema Chiku Issa.
Katika hotuba yake, Chiku Issa hakusita kuelezea shukrani za kipekee kwa Chama cha Mapinduzi na jumuiya ya Umoja wa Wanawake Tanzania (UWT) kwa kumlea kisiasa na kumpa fursa ya kuitumikia nchi.
<span;>> “Ubunge wangu mteule ni matokeo ya demokrasia iliyo ndani ya CCM. Kwa unyenyekevu mkubwa nasema ASANTE kwa chama changu na UWT katika ngazi zote. Ndiyo waliokuwa shule yangu ya uongozi, na leo nimefika hapa kwa juhudi zao na baraka za Mungu,” alisema kwa hisia.
Aliahidi kulitumikia Taifa kwa uaminifu, kutekeleza Ilani ya CCM 2025–2030, na kusimamia maslahi ya wanawake na vijana, huku akiahidi kuendelea kuinua jina la Mkoa wa Arusha katika sekta za maendeleo.
Akihitimisha hotuba yake, Chiku Issa alisisitiza kauli mbiu yake ya “Kazi na Utu”, akiwataka Watanzania wote kuendelea kuenzi amani na umoja waliokuwa nao kwa miongo kadhaa.
<span;>> “Sote twendeni tukapige kura. Tumpe ‘NDIO’ Mgombea wa Urais Mheshimiwa Dkt. Samia Suluhu Hassan, pamoja na wabunge na madiwani wote wa CCM. Kwa pamoja tutaendelea kujenga Tanzania yenye amani, upendo na maendeleo kwa wote,” alisema.
Chiku Issa ni miongoni mwa wanawake vijana wanaochipukia ndani ya CCM, akitambulika kwa mtazamo wa kisasa wa uongozi, ushawishi chanya kwa wanawake, na dhamira ya kuona Arusha inakuwa kitovu cha maendeleo ya kijamii na kiuchumi katika Kanda ya Kaskazini.
Ends..
