Na Richard Mrusha A24TV
Aeleza ongezeko la malori bandarini kutoka 2,100 hadi zaidi ya 3,100 kwa siku; asisitiza urithi wa uongozi, ushirikiano na sekta binafsi na uwekezaji katika miundombinu
Mkuu wa Mkoa wa Dar es Salaam, Albert Chalamila, amesisitiza umuhimu wa taasisi za umma kujiwekea mipango ya muda mrefu ya uongozi na kuimarisha ushirikiano na sekta binafsi ili kukabiliana na ukuaji wa jiji hilo na kuongeza kasi ya maendeleo ya kiuchumi.
Chalamila alieleza hayo Oktoba 23,2026 Jijini Dar es Salaam amesema kuwa ukuaji wa shughuli za usafirishaji na ongezeko la mahitaji ya huduma jijini Dar es Salaam vinahitaji taasisi kujiandaa mapema, kuimarisha miundombinu na kuweka mifumo itakayohakikisha mafanikio yanaendelea hata baada ya mabadiliko ya viongozi.
Alitolea mfano wa shughuli za Bandari ya Dar es Salaam, akibainisha kuwa idadi ya malori yanayoingia bandarini kuchukua na kusafirisha mizigo imeongezeka kutoka takribani 2,100 kwa siku hadi zaidi ya 3,100, hali inayoonesha ongezeko la shughuli za usafirishaji.
Alisisitiza umuhimu wa kuimarisha matumizi ya bandari kavu (dry ports) kama njia mojawapo ya kupunguza msongamano bandarini na kurahisisha usafirishaji wa mizigo kwenda maeneo mbalimbali.
Katika hotuba yake, Chalamila alisisitiza umuhimu wa taasisi kuwa na mpango wa kurithi uongozi (succession plan) utakaowasaidia kuandaa viongozi wapya wenye uwezo wa kuendeleza maono, mikakati na mafanikio ya taasisi husika.
Alimpongeza Mkurugenzi wa Mamlaka ya Usimamizi wa Bandari Tanzania (TPA) kwa kazi aliyoifanya, akieleza umuhimu wa kuendeleza utendaji bora kupitia mifumo inayohakikisha taasisi haziathiriki na mabadiliko ya viongozi.
Alisema maandalizi ya viongozi watakaorithi nafasi za watangulizi wao ni muhimu katika kulinda mwendelezo wa mipango na utekelezaji wa majukumu ya taasisi.
Chalamila pia alihimiza taasisi za Serikali kuimarisha ushirikiano na sekta binafsi ili kuongeza uwekezaji, kuharakisha utekelezaji wa miradi na kugawana hatari zinazoweza kujitokeza katika shughuli za kiuchumi.
Alieleza kuwa ushirikiano huo unaweza kusaidia kutumia rasilimali na utaalamu wa pande zote mbili katika kuboresha huduma na kuimarisha ushindani wa kiuchumi wa Dar es Salaam.
Katika eneo la miundombinu, aligusia umuhimu wa miradi ya barabara, ikiwemo Barabara ya Morogoro na miradi mingine inayoendelea, katika kuboresha usafiri na kurahisisha shughuli za kiuchumi.
Mkuu huyo wa mkoa alieleza kuwa Dar es Salaam ina eneo la takribani kilomita za mraba 1,500 na inatarajiwa kuendelea kukua kwa kasi katika miaka ijayo, huku mahitaji ya usafiri, makazi na huduma nyingine yakiongezeka.
Alisisitiza umuhimu wa mipango inayozingatia ukuaji huo ili kuhakikisha miundombinu na huduma zinaendana na mahitaji ya wakazi na shughuli za biashara.
Kwa mujibu wa maelezo yaliyotolewa, ujumbe mkuu wa hotuba hiyo ni kwamba maendeleo endelevu ya Dar es Salaam yanahitaji mipango ya muda mrefu, uongozi unaoandaa warithi, miundombinu inayokidhi mahitaji na ushirikiano wenye tija kati ya Serikali na sekta binafsi.
Kwa upande wake Mtendaji Mkuu wa TBA,Said Mndeme amesema kuwa Kwa Sasa wanasimamia nyumba 6,629 nchi mzima huku Mkoa WA Dar es Salaam ukiwa na nyumba 1,080.
Aliongeza kuwa TBA,ilianzishwa Mei 2002 chini ya Sheria ya Wakala za Serikali Na.30 ya 1997, ambayo imefanyiwa marekebisho kadhaa ikiwemo ya mwaka 2023(Gazeti la Serikali Na.595) ili kuendana na ukuaju WA miji na kuongezeka ushirikiano na sekta binafsi
Mwishoo.
